Sapaatip-akunnerani matumani Asiaq Tasiilap umiarsualiviani, Tasiilallu eqqaaniittuni nunaqarfinni umiarsualivinni immap itissusaanik uuttortaavoq. Uuttortaanerit aallaavigalugit immap itissusaat eqqortut pigineqalissapput, siunissamilu umiarsualivinni angallannermut iluaqutaassallutik.
Uuttortaanerit Ineqarnermut Attaveqaasersuinermullu Naalakkersuisoqarfik qanimut suleqatigalugu aningaasaliisoralugulu ingerlanneqarpoq, Naalakkersuisoqarfillu umiarsualivinnut akisussaasutut inissisimavoq. Uuttortaanerit Asiap aquuteralaanik aluminium-imik sanaajusumik ingerlanneqarput, aquuteralak multibeam ekkolod-eqarpoq. Multibeam ekkolod nutaaliaavoq piginnaasaqaqalunilu, itissusaanik uuttortaaginnarani immap naqqa eqqortumik 3D-mik scanner-neqarsinnaavoq. Ineqarnermut Attaveqaasersuutinullu Naalakkersuisup Hans Peter Poulsenip tulliuttutut oqaaseqaataa Asiap tiguaa:
- Tasiilami, Tasiilallu umiarsualiviini uuttortaanerit maanna aallartinneqarmata nuannaarutigingaarpara. Umiarsualivinni imaani angallannermi isumannaallisaanermut tapertaanissaq, Naalakkersuisunut pingaaruteqarpoq. Tunumi umiarsualiviit arlaqartut nutaalianik uuttortarneqarnissaat sivisuumik utaqqineqarsimavoq, taamaattumillu Asiaq suleqatigalugu umiarsualiviutitta arlaqartut itissuaat paasissagatsigit nuannaarutigaara.
Paasissutissat katersorneqartut Asiaq-mi suliareqqinneqarumaarput, kingusinnerusukkullu Geodatastyrel-sip saqqummiuttagaanut Kalaallit Nunaata Umiarsualiviinut ilanngunneqarumaarlutik.
Uuttortaanermi itissutsit pissarsiariinnarnagit immap naqqata isikkua aamma takuneqartarpoq, ilaatigullu soorlu umiarsuit, cykelit, pisiniarfimmi kaassuartakkat assigisaallu kivinikut takuneqarsinnaallutik.
