Silaannaap pissusaa pillugu ilisimatusarnissamut nutaamut, ICELINK-imik taasamut, EU aningaasaliivoq. Suliniummi silaannaap pissusaata allanngoriartornera Nunani avannarlerni sermimut sikunullu qanoq sunniuteqarnersoq misissorneqarniarpoq.
- EU-p ICELINK-imik suliniuteqarnissatsinnut aningaasaliiniarnera angusaavoq angisoorujussuaq. Suliniut ilisimatusarnerup iluani suliniutaavoq annertooq, Asiaq-miillu ilisimatusarfiit Island-imeersut, Danmark-imeersut, Østrig-imeersut, Belgia-meersut, Spania-meersut Tyskland-imeersullu peqatigalugit silaannaap pissusaata allanngoriartornera Kalaallit Nunaannut Nunanullu avannarlernut qanoq sunniuteqarnersoq ilisimasaqarfigineqalissaaq, taama oqarpoq Asiaq-mi pisortaaneq, Mette Skarregaard Pedersen.
EU-mit ICELINK-imik suliniut ukiuni tulliuttuni tallimani 55 million kruunit missaanni aningaasaliiffigineqarpoq. Aningaasaliissutit suliniummi peqataasunut ilisimatusarfinnut assigiinngitsunut agguaanaanneqassapput. Asiaq-mullu 5 million kruunit missaat aningaasaliissutigineqassapput.
- Nunat assigiinngitsut suliassaqarfiillu assigiinngitsut akimorlugit suleqatigiinnikkut silaannaap pissusaata allanngoriartorneranit Nunani avannarlerni sermimut sikunullu sunniutit ilisimasaqarfigineqarnerulissapput.
Asiaq-mi ilisimatuut misilittagallit arlallit atorfeqartinneqarput, taakkualu Kalaallit Nunaanni Issittumilu avatangiisit silaannaallu pissusaat immikkuullarissut ilisimasaqarfigineqarput. Suliniummi paasissutissat qaammataasaneersut, silaannaap pissusaanut ilusiliat, sermit ingerlaarfii malillugit ilusiliat nakkutiginninnerillu toqqaannartut aallaavigalugit ilisimatusartoqassaaq.
- Tulluusimaaqaanga Asiaq-mi ilisimatuunik taamak pikkoritsigisunik sulisoqaratta. Ilisimatusartartuutigut killiffitta angunissaannut EU-mullu qinnuteqaasiap iluatsinnissaanut sulilluarsimaqaat. Nuannaartorujussuuvugut. Nunatsinni silaannaap pissusaata ilisimatusarfigineqarnerani peqataanissarput pingaaruteqartorujussuuvoq, taamaaliornikkut ilisimatusarnerup Kalaallit Nunaannut iluaqutaanissaa qulakkeerinneqataaffigissavarput. EU-mit aningaasaliisoqarneratigut ilisimatuut suleqatigisagut amerlisinnaavagut, iliuuserisagullu pitsaanerulersissinnaallutigit.
ICELINK-imik suliniut 1. februaari 2025 aallartinneqassaaq, naatsorsuutigineqarlunilu ukiut sisamat ingerlanneqassasoq. Suliniummi ilaatigut Kalaallit Nunaata pisariaqartitaat pillugit ilisimasanik atortunillu qulakkeerinninnissamut attuumassutillit Asiaq-mit aqunneqarlutik ingerlanneqassapput.
Paasissutissat
Asiaq – Greenland Surveyimi misissueqqaarnerit ilisimatusarnerillu ingerlanneqartarput. Asiaq-mi Kalaallit Nunaata avatangiisiani uumaatsut pillugit paasissutissat katersorneqartarput. Asiaq silaannaap, erngup sermillu pillugit nunatsinni nunallu tamalaat akornanni ilisimatusartoqartillugu ilaasarpoq.
