Asiaq Advanced Research + Invention Agency (ARIA)-mit 9,5 mio. Kr.-inik aningaasaliiffigineqarpoq. Aningaasat suliniummut TUNU-mik taasamut atorneqassapput, tassanilu ilaatigut Kalaallit Nunaata Kangiata sineriaani silasiutit tallimat pilersinneqassapput.
ARIA-mi ilisimatusarnermi suliniutigineqartoq, Forecasting Tipping Pointsimik taaguutilimmi, siusinaarluni kalerrisaarummik inerisaasoqarniarpoq, taannalu atorlugu silaannaap pissusaani allannguutit annertuut naatsorsornissaannut siulittuisoqarsinnaalissaaq, taannalu aamma tipping points-imik taaneqartarpoq. Asiaq-mi ilisimatuussutsikkut suliniut TUNU, suliniummut qulaani taaneqartumut ilaalerpoq, tassanilu silaannaap pissusaa pillugu paasissutissanik katersisoqassaaq, taakkualu silaannaap pissusaa pillugu kalerrisaarutinik inerisaanissamut uppernarsaanissamullu pingaaruteqarput,
- Silaannaap pissusaanut takussutissanik siulittuutinillu pitsaasunik pilersitsinissamut sila pillugu paasissutissat sumiiffimmeersut pingaaruteqaraluaqisut, ullumikkut tunumi silasiutit ikitsuinnaat pigineqarput. Taamaattumik nuannaarutigeqaarput ARIA-mit suliniut TUNU 9,5 mio. kr.-inik aningaasaliiffigineqarmat, taamaalillutami silasiutinik nutaalianik Nanortalimmiit Ittoqqortoormiit tungaanut ikkussuisinnaalerpugut, taama oqarpoq Asiaq-mi pisortaaneq, Mette Skarregaard Pedersen.
ARIA-mi suliniummi silaannaap pissusaani annertuumik allanngortoqalertillugu imaluunniit tipping pointsit nalilertillugit kalerrisaarummik ineriartortitsisoqarpoq. Silaannaap pissusaata iluani tipping pointsit tassaapput silaannaap pissusaani allanngornerit navianaatip nalaanniittut, silaannaap pissusaani allannguuti annikitsut annertuumik allanngorteqqinneqarsinnaanngitsumillu kingunerluuteqarsinnaapput. Nunarsuarmi silaannaap pissusaani pingaarutilik tassaavoq subpolare gyre, tassa Kalaallit Nunaata kujataaniit kangianut immami sarfarneq. ARIA-mi ilisimatuussutsikkut suliniummi pingaarutillit ilagaat immap sarfaanut sermersuarmullu sunniutit misissussallugit, ilisimasallu aallaavigalugit immap sarfaani tipping pointsinik siulittuisinnaanngornissaq.
Silaannaap pissusaa pillugu paasissutissat katersorneqartut silaannaap pissusaannik ilisimatusarnermut kalerrisaarutinillu suliaqarnermut pingaaruteqaannaratik aamma inuiaqatigiinnit, suliffeqarfinnit inuiaqatigiinnillu pissarsiarineqarsinnaalissapput.
- Kangiata sineriaani silasiutit nutaat ilisimatuussutsimut sumiiffiullu nalaani angalasartunut naleqartorujussuussapput, tamannalu tamanut iluaqutaassaaq. ARIA-mit tapiissutittaaq atorlugit teknologi nutaaq misilittassavarput, taamaalilluta silasiorfitsinni ingerlaavartumik pitsanngorsaasinnaalissaagut.
Suliniut TUNU 2025-p aasaanerani aallartissaaq, silasiutillu immikkut suliat 2027 aasap ingerlanerani ikkussuunneqassallutik. Aningaasaliineq isumaqatigiissutit pillugit isumaqatiginninniarnermut pituttoqqavoq.
Advanced Research + Invention Agency (ARIA) Tuluit Nunaanni ilisimatusarnermut pisortaqarfiuvoq, tassani ilisimatusarnerit, ilisimatuussutsip iluani nutaaliorfiusinnaasut, inuiaqatigiinnullu tamanut iluaqutaasinnaasut aningaasaliiffigineqartarput.
