Asiaq-ip nuannaarutigalugu nalunaarutiginiarpaa nunap assingi tamakkiisut siulliit maanna piareersimalermata. Nunap assingani inoqarfiit nunaannaallu takuneqarsinnaalerput.
Styrelsen for Dataforsyning og Infrastruktur (SDFI) -ip akisussaaffigivaa Kalaallit Nunaanni nuna inoqarfiunngitsoq nunap assiliuutissallugu, Asiaq-illu akissussaaffigivaa Kalaallit Nunaanni illoqarfiit nunaqarfiillu nunap asseqarnissaat. Asiaq-mit suliarineqartut ingerlaavartumik ikkussuunneqartarput, tassami inuiaqatigiit ineriartortinneqarnissaannut illoqarfiit nunaqarfiillu assingi eqqortut pisariaqartinneqarmata.
”Innuttaasunut, oqartussaqarfinnut namminersortutullu inuussutissarsiutilinnut nunap assinga eqqortoq paasissutissanillu imaqarluartoq pisariaqartinneqarpoq. Asiaq-millu suliassaq taamanna pingaarutilittut isigalugu suliarisarparput. Ukiut tamaasa nunarput angalasarparput, dronellu atorlugit qulakkeerniartarlutigu nunap assingi, assilisaatigullu nutaajunissaat eqqortuunissaallu,” taama oqarpoq, Asiaq-mi pisortaaneq Mette Skarregaard.
”Nuannaarutigeqaarput nunap assinga tamakkerluni maanna piareermat, suliaq kusanaqaaq, Asiaq-miillu nuannaarutigeqaarput suliniummut peqataasinnaagatta.”
”Pingaaruteqartorujussuuvoq nunap assingi Kalaallit Nunaanni pissarsiarineqariaannaanissaat aammalu SDFI-p suliai Asiaq-illu suliai ataatsimut takuneqarsinnaanissaat. Pisortaqarfiit innuttaasullu nunap assiinut eqqortunut tutsuiginartunullu takusaqarsinnaanissaat pisariitsuutissavarput,” Mette Skarregaard naggasiivoq.
Nunaqarfiit, illoqarfiit nunaannaallu pillugit nunap assingi, silaannarmit assilisat maanna Asiaq-ip nunap assingasut takutitsissutaat atorlugu iserfigineqarsinnaanngoreerpoq: https://kortvisning.asiaq.gl
Asiaq-ip illoqarfinnut nunaqarfinnullu suliarisartagai ingerlaavartumik nutarterneqartarput. 2022-p ingerlanerani nunap assinganik nutarteriniarluni Asiaq-mit tikinneqarsimasut tassaapput Nanortalik, Narsaq, Paamiut, Nuuk kiisalu Upernaviup Uummannallu nunaqarfii. 2023-p ingerlanerani nunap assingini nutarterinissamut Asiaq-mit tikinneqartussat tassaapput Ilulissat, Aasiaat, Sisimiut aammalu Qaqortoq.
Paasissutissat
Kalaallit Nunaata nunap asseqalernissaanut suliniut ukiut 4 ingerlanneqarsimavoq, suliniullu Nammnersorlutik Oqartussat, Asiaq ilanngullugu, Styrelsen for Dataforsyning og Infrastruktur, Forsvarsministeriet Materiel- og Indkøbsstyrelsemillu suleqatigiissutigineqarsimalluni, aningaasaliissuusimallutillu A.P. Møller og Hustru Chastine Mc-Kinney Møllers Fond (A.P. Møller Fonden).
Asiaq Namminersorlutik Oqartussat ataanni suliffeqarfiuvoq namminersortitaq Kalaallit Nunaannilu avatangiisit tigussaasut pillugit, soorlu imeqarnermut, geoteknikkimut, nunamik uuttortaanermut, nunap assilerinermut, silaannaap pissusaanut attuumassusilinnut suliassaqarfiuvoq, paasissutissat pissarsiarineqartut pisortaqarfinnut, innuttaasunut, namminersortutut inuussutissarsiortunut, ilisimatusartunut allarpassuarnullu atugassiarineqartarput.
