Kalaallit Nunaata avatangiisiani sillimanartumik angalasoqarsinnaanissaanut anguniarlugu Asiaq Visit Greenland nunanilu avannarlerni suleqatigisartakkat allat filmiliorput. Filmimi aputip sisoorsinnaanera, iluliarsuit muminneranni malissuaqarsinnaanera, ujaqqanik nakkaasoqarsinnaanera, innermik atuineq silallu allanngorarsinnaanera takuneqarsinnaapput. Filmi takornarissanut takutitassiaavoq, taakkuami tassaammata Kalaallit Nunaata pinngortitaani angallannissamut ilisimasakinnerit, taamaakkaluartoq kikkulluunniit filmi aamma isiginnaarsinnaavaat.
Filmi aqqutigalugu takornarissat nunap atuarsinnaanissaanut maluginnissinnaanissaat anguniarneqarpoq, filmimi titartagaasumi takornarissat takusinnaassavaat iluliap muminnera, ujaqqat nakkaaneri assigisaallu. Filmimittaaq takornarissat pinngortitamukannginnerminnut silamut ilimasaaarutinik (dmi.dk/gronland) silallu maannamut inissisimaffiinik (vejr.asiaq.gl) malinnaaqquneqarput.
- “Asiaq-mi silamut uuttuutinik ingerlataqarpugut, taakkualu aqqutigalugit sumiiffinni assigiinngitsuni silap inissisimanera qanoq innersoq takuneqarsinnaavoq. Sila pillugu nalunaarsukkat nittartagarput (vejr.asiaq.gl) aqqutigalugu ingerlaavartumik malinnaaffigineqarsinnaapput. Ulluinnarni nittartakkatta nunaqartunit atorneqarnera ilisimavarput, tamannalu nuannaarutigeqaarput”, Asiaq-mi pisortaaneq Mette Skarregaard Pedersen taama oqarpoq.
- “Maanna Visit Greenland peqatigalugu takornarissanut tikittartunullu allanut saaffiginnippugut, taakkuami aamma sila pillugu paasisassat sumut ujartussanerlugit ilisimaniassammassuk aammalu pinngortitamukannginnerminni suut eqqumaffigissanerlugit ilisimalerniassammassuk”.
Filmip siunertaa tassaavoq takornarissat Kalaallit Nunaata pinngortaanukannginnerminni navianartoqarsinnaanerannut qanoq piareersarnissaminnik ilisimasaqalernissaat.
- “Visit Greenlandimi ersarissumik anguniagaqarpugut: Kalaallit Nunaata misigisassarsiorfissatut, pitsaassutsimik, isumannaassutsimik piujuartitsisumillu ukkatarinnittutut nittarsaannissaa. Anguniagaq pingaarnerpaaq tassaavoq takornariat puigussarinngisaminnik misigisaqartinnissaat, isumannaatsumillu eqqaamasanik angerlaassinissaat. Suliniut una ataatsimoorussaq takornariat peqatigalugit naatsorsuutigisanik ersarissumik taasinissamut alloriarneruvoq. Tamannalu angalanermi pitsaasunik akisussaassusilimmillu misigisaqarnermut qulakkeerinninnissamut pingaaruteqarpoq”. Visit Greenlandimi pisortaq Anne Nivika
Grødem oqarpoq - “Asiaq-mi Kalaallit Nunaanni avatangiiserput pillugit paasissutissanik katersineq siunnersuinerlu pikkoriffigaarput. Paasissutissat katersorniaannarlugit katersunngilagut, inuiaqatigiinnulli naleqalersitsisussatut katersorpagut. Taannalu siunertariuaannarparput, taamaattumik Asiaq-mit filmiarannguaq tulluusimaarutigeqaarput, paasissutissanik paasiuminartunik pingaarutilinnillu imaqarpoq”, pisortaaneq naggasiivoq.
Filmimi takornarissanut naatsorsuussaavoq, taamaakkaluartoq filmi atuarfinni allaniluunniit aamma atorneqarsinnaavoq.
Asiaq-ip sila pillugu nalunaarsugai uani vejr.asiaq.gl takuneqarsinnaapput.
Filmi minutsinik 8-nik siviussuseqarpoq, uanilu takuneqarsinnaalluni.
Paasissutissat
Filmi uku suleqatigalugit pilersinneqarpoq:
Suliniut aningaasaliiffinnit ukunanit aningaasalerneqarpoq:
